Hæhæ,

Við erum loksins flutt. Þetta gekk ótrúlega vel að flytja en það gengur hægar að ganga frá öllu dótinu. Ég er búin að ganga frá í eldhúsinu svona alveg næstum því. Við erum alveg með nýjustu tísku sem felur í sér steininn á gólfinu og í plast í loftinu og hurðar vantar. Við erum alveg með nýjustu tísku í þessum efnum.
Stóra flísamálið féll um sjálft sig þar sem við gátum ekki beðið lengur eftir úrskurði frá dómnefndinni og keyptum flísar í Byko á afslætti og ég er elskusátt við þær, hinar voru líka orðnar ljótar í mínum huga . Keyptum á steingráar á baðið og drapplitaðar í sama stíl á hitt. Svo þið eruð velkomin í heimsókn og gætuð kannski hjálpað mér að taka uppúr kössum hehehe.
Fjölskyldan hefur ekki haft það sem best, við erum öll búin að vera lasin í janúar eða börnin byrjuðu á milli jóla og nýárs og eru búin að vera með kvef síðan og hósta svolítið ennþá bæði tvö en Ríkharð Pétur er verri og ég er að hugleiða að fara með hann til læknis útaf þessu kvefi, kannski þarf bara að skoða nefeitlana, hann bara losnar ekki við þetta kvef. Hefur verið með mismikið kvef frá fæðingu. Ég fékk svo helgina fyrir flutningana þessa svaðalegu niðurpesti sem hefur verið að ganga og missti fjögur kíló á fjórum dögum og þornaði næstum upp. Ríkharð Pétur var orðinn svo svangur um kvöldið á þriðja degi pestar að ég var ráðalaus. Ég keypti svo þurrmjólk og gaf honum þrjú kvöld í röð en er enn að reyna að auka mjólkina hjá mér og það gengur hægt og sígandi en mér finnst samt eins og mjólkin verði ekki eins mikil og hún var fyrir pest. Vona samt það besta. Ég vil halda honum á brjósti til allavega 6 mán. en þá má það fara að minnka . Hafsteinn hefur sloppið að mestu en hann var gjörsamlega uppgefinn andlega sem líkamlega eftir að við vorum flutt og hann notaði síðustu helgi til að slaka á og fá tíma fyrir sig. Við fjölskyldan verðum svo að taka tíma frá um næstu helgi og koma herberginu hennar Helgu í stand svo hún geti farið að leika sér hér og kalla þetta "heima" hún segir ennþá "húsið" og ef við keyrum í Einholtið sem við höfum þurft að gera útaf leigjendunum þá kallar hún það heima.
Snúllan er svo frábær, syngur daginn út og inn, meistari jakob, gulur rauður og úmbarassa á milli gömlu vísnanna um afa og ömmu og hvítu fiðrildin. Hún er himinsæl á leikskólanum en líka himinsæl þegar við komum og sækjum hana. Hún er byrjuð að reyna að klæða sig sjálf o það gengur mjög vel, nema hvað hún er svolítið lengi en þá verður maður bara að vera þolinmóður við þessa elsku. Hún reynir hið ítrasta að ráða og er farin að benda ákveðið á móti mér og segja nei ef ég byrsti mig við hana. Hún er búin að kynnast skammakróknum hér í húsinu. Það er þvottahúsgólfið og þegar hún fór þangað þá stóð hún bara þar voða góð og hugsaði málið, þorði ekki að stíga út fyrir dyr. Þetta verður barátta að aga hana en það er bara gaman þó að hún reyni á þolrifin í manni, snúllan litla.
Ríkharð Pétur rifnar í sundur, ég veit ekki hvað hann er orðinn langur, við förum ekki í skoðun fyrr en 27. feb en það verður ansi spennandi. Hann er voðalega glaður og langt frá því að vera eins mikil mannafæla og Helga Dís var á hans aldri en hann er frekar hræddur við fólk með gleraugu en um leið og þau eru tekin niður þá virðist allt vera í lagi. Hann er óþolinmóður ef hann er svangur og finnst voða gott að láta halda á sér . Hann er alveg frávita af pirringi í gómunum og langverstur á kvöldin, þá virðist ekkert vera hægt að gera fyrir greyið. Hann er búin að velta sér á magann tvisvar sinnum og einu sinni aftur á bakið, hann er líka að reyna að læra að sitja en vill helst standa og finnst voða gaman að labba þegar hann stendur. Ég læt hann að liggja á teppinu svolítið svo hann þjálfist og honum finnst það voðalega gaman.
Við tókum engar myndir af börnunum eða húsinu í jan. af því að hún er enn full af myndum frá des. en það verður breyting á því á næstu dögum, ég á enn eftir að setja inn nóv. og des. albúm hjá þeim báðum.

Þetta er orðið gott í bili, heyrumst síðar og endilega kommentið ef einhverjir koma enn hér inn.

Hamingjukveðjur, Fanney Bergrós, nýflutt í draumahúsið sitt .

Hæhæ, ég viðurkenni fúslega að það er kominn tími á blogg. Tíminn er samt ekkert sem ég á nóg af ef þið skiljið hvað ég meina.
Það hefur ýmislegt gerst hjá okkur, við fórum suður með krílin og það gekk mjög vel, bæði börnin hafa verið lasin og við erum að fara í stríð við búð hér í bæ útaf gólfflísum, bloggið er læst af því að ég vil ekki láta viðkomandi verslunarstjóra sjá þetta. En byrjum á suðurferðinni.

Við lögðum í hann um hádegi á miðvikudeginum 19.nóv. Þá um morguninn fór ég með Hafstein í vinnuna og Helgu á leikskólannm og kláraði að erindast fyrir ferðina með Ríkharð með mér, hann bara svaf á meðan svo um hádegi náði ég í Helgu, strax eftir matinn hjá henni og áður en hún lagði sig. Þá náðum við í Hafstein og þá var bara smáatriði eftir, ná í töskuna okkar þar sem Hafsteinn þurfti að klára að setja í hana það sem hann vildi hafa með og svo bara bensínstopp. Þá vorum við lögð af stað. Helga svaf ekki lengi í fyrra skiptið sem hún sofnaði en hún sofnaði aftur rétt áður en við komum í göngin. Ríkharð svaf alla leið á Blönduós og þá gaf ég honum og skipti á þeim báðum og svo gaf ég honum aftur rétt áður en við komum að Staðarskála. Við vorum komin í bæinn um 8 leytið og fórum þá til Guðrúnar Helgu sem var búin að sækja lyklana að íbúðinni fyrir okkur. Því næst lá leiðin á Wilson's pizza til að fá okkur í svanginn áður en við færum í íbúðina. Íbúðin er í Sólheimum og er hún mjög notaleg þó hún sé orðin gömul. Við slökuðum svo á og komum Helgu niður sem var orðin frekar lúin greyið.
Á fimmtudeginum vorum við í rólegheitunum fram að hádegi og fórum svo í Ikea eftir svefninn hjá Helgu á meðan var Guðrún Helga með nöfnu sína og þær fóru saman í húsdýragarðinn. Við vorum jafnlengi í Ikea og þær voru í húsdýragarðinum. Við gengum frá innréttingunum okkar og ákváðum hvernig við færum að því að flytja þær o.s.frv. Við hittum svo nöfnurnar á Pizza hut og fengum okkur að borða saman og svo fórum við heim lúin og sátt. Á föstudeginum fórum við í búðarráp að reyna að finna flísar, bæði á bílskúrinn og á milli inréttinganna í eldhúsinu og við fundum þær. Bílskúrsflísarnar fengum við í Álfaborg en hinar í Flísabúðinni. Þá um kvöldið fórum við í mat til Söndru frænku sem bauð uppá svínalundir. Við hittum líka Kötu og Betu en Sverrir var að vinna. Það var alveg geggjað að fá að borða og að hitta mæðgurnar og börnin. Við sáum það að ef við byggjum ekki á sitt hvoru landshorninu gætu Helga Dís og Jón Pétur orðið mjög góðir vinir. Sandra lenti í smá óhappi á leiðinni heim úr búðinni eftir að við komum en enginn slasaðist og bílarnir skemmdust mjög lítið.
Á laugardeginum fórum við í fleiri búðir og svo Ikea og versluðum svona smádót sem og afmælisgjöfina hennar Helgu Dísar eitt stykki rúm. Svona er það nema hvítt og mjög fallegt, er ekki inni á íslensku síðunni. http://www.ikea.com/gb/en/catalog/products/S99827959.
Á sunnudeginum fórum við í morgunmat til Helga og Ragnheiðar og eyddum notalegri stund með þeim, þá vorum við búin að ganga frá íbúðinni og ætluðum beina leið heim eftir að hafa verið í morgunkaffi. Það gekk eftir en við báðum Ragnheiði að kaupa fyrir okkur jólagjöfina handa Helgu í Hagkaup og hún ætlaði að senda hana norður með mömmu sinni og pabba á fimmtudeginum í vikunni þar á eftir. Heimferðin gekk eins og í sögu, krílin sofnuðu bæði og við stoppuðum svo í Staðarskála þar sem voru bleyjuskipti og ég gaf Ríkharð Pétri. RP sofnaði svo aftur og við hlustuðum á Ávaxtakörfuna með HD á milli þess sem við spottuðum hesta og kindur út um allar jarðir á leiðinni. Við vorum komin heim um kvöldmatarleytið sæl og sátt.

Stóra flísamálið er þannig. Við erum búin að panta okkur flísar í einni búð hér í bæ og gerðum það í sept. þegar þær voru auglýstar í N4 dagskránni. Þær voru ekki til þá þrátt fyrir að hafa verið auglýstar ég ætla að setja hér inn söguna okkar sem við sendum Neytendasamtökunum og Hafsteinn skrifaði svona til að láta ykkur vita hvernig þetta hefur verið.

• Málið er að ég er að byggja mér hús og vantaði flísar. Búð hér í bæ auglýsti í N4 dagskránni um miðjan september flísar á verðinu 2.790,- kr. fm. sem ég hafði áhuga á að versla.
•  
• Ég fer og ætla kaupa flísar sem auglýstar eru hjá þeim. Þá kemur í ljós að þær eru ekki til og ég bið þá um að panta fyrir mig. (Þeir auglýsa í raun vöru sem ekki er til) Það er gert og mér er sagt að þær muni koma eftir 2-3 vikur. Ég spyr hvort ég fái þessar flísar ekki á auglýstu verði og samþykkja þeir það verð. Vorum 4 þarna inni, ég og konan mín, og tveir starfsmenn búðarinnar. Ég segi þeim að ég þurfi þetta og geti borgað um leið og þær komi. Eftir 3 vikur heyri ég í þeim og þá segja þeir að flísarnar séu ekki komnar, og tala um mánaðarmótin okt-nóv. Ekki segja þeir neitt um breytingu á verði fyrir þann tíma. Um mánaðarmótin fer ég til þeirra og þá eru flísarnar ekki komnar heldur. Þeir segja hugsanlega 2 vikur í þær ennþá. Enn segja þeir ekkert um breytingar á verði. um miðjan nóv. er ég í sambandi við þá og þá segja þeir að flísarnar eigi að koma um mánaðarmót nóv. des !!
•  
• Á þessum tímapunkti var ég búinn að hringja í þá líklega um 8 sinnum til að athuga með stöðuna og spurði yfirleitt um hvort verðið myndi ekki standa og það var samþykkt.
•  
• Það sem ég pantaði voru 2 litir, og er annar liturinn kominn. Ég sótti hann til þeirra en þá var yfirmaðurinn ekki við og afgreiddi starfsmaðurinn mig sem var þarna þegar ég fékk tilboðið seint í sept. Þá kemur í ljós að flísarnar eru búnar að hækka um 500,- kr. fm Ég sagði honum að við hefðum samið um annað verð og mundi hann það mjög vel. Hann segir við mig “ég hef ekki réttindi til að breyta verðinu í tölvunni þannig að taktu bara flísarnar og yfirmaðurinn minn breytir þessu þegar hann kemur og þá kemur þú bara og borgar”
•  
• Seinna um daginn hringir yfirmaður hans í mig og segir mér að flísarnar séu bara búnar að hækka um þetta og ég þurfi að borga annars selji hann þær bara öðrum. Ég brást illur við þessu enda mér lofað öðru og með tilboð í höndum. Hann segir að tilboð frá sept. sé bara ekki í gildi þar sem nú væri að koma des. og svo væri ástand á mörkuðum slæmt og ekkert sé hægt að gera.
•  
• Þar sem mig vantar flísar og er búinn að bíða í 10 vikur eftir þeim spyr hann hvort við gætum þá bara ekki samið um að ég myndi taka á mig 250 kr. hækkun og hann 250 kr. lækkun. Það var ekki séns, verðið myndi ekki haggast um krónu !
• En hann bauð mér flísalím á afslætti í staðin !!!!! og segir svo með hroka “auðvitað kaupirðu það hér”

Við erum s.s búin að skila flísunum sem við tókum hjá þeim og ætlum að fara með þetta fyrir kærunefnd þjónustu- og lausafjárkaupa og fá niðurstöðu hvort þeir séu ekki að brjóta samninga. Kæran fer frá okkur í dag eða á morgun og við sjáum til hvað gerist. Það er vegna þessa sem ég ætla að læsa blogginum mínu því ekki vil ég að þessi yfirmaður hjá þessari búð sjái þetta ef einhver sem les bloggið mitt þekkir viðkomandi. Allavega ekki fyrr en við fáum úrskurð. Allir sem við höfum sagt þessa sögu segja að við ættum að gera þetta svona og við ætlum að gera það. Þetta er bara orðið prinsippatriði hjá okkur og við gefumst ekki upp fyri hroka og yfirgangi takk fyrir sama hvort við fáum þessar flísar eða ekki.

Veikindi barnanna, Helga Dís veiktist á þriðjudagin með hita og kvef og það er langt síðan ég hef séð hana svona lasna greyið. Hún var orðin hitalaus á fös. en er enn að berjast við kvef og hósta. Ríkharð Pétur er með voðalega hósta og hann er kominn niður í lungnaberkjurnar, við fórum með þau bæði til læknis í gær á FSA, það vildi svo vel til að það var Þórir sem tók á móti okkur en hann er heimilislæknirinn okkar. Hann sagði að við þyrftum að gefa RP púst sem hjálpar honum að berjast við þetta og við erum að því. Við eigum tíma hjá Þóri aftur á fimmtudag og þá læt ég hann hlusta hann þá en tíminn er vegna þess að RP er með sveigju á hryggnum sem virðist vera vegna þess hve hann er stífur vöðvunum í vinstri síðunni og þessi stífni togar hrygginn til hliðar við ætlum að athuga hvort þetta séu ekki bara vöðvarnir og vona að það sé ekki eitthvað alvarlegra. Vonandi bara eitthvað sem sjúkraþjálfun lagar. Annað er það að hann er að stækka kúturinn orðinn 60,3 sm og 5,5 kg. algjör risi enda rifnar hann í sundur. Hann fylgir þó alveg kúrfu, er bara flottastur í heimi .

Við höfum ekki verið neitt ofdugleg við að byggja. Það stendur allt til bóta þar sem Hafsteinn er að fara í 100% orlof á næstu dögum of þegar búið er að klæða veggi þá get ég farið að setja mitt mark á húsið með því að sparsla. Við vonumst til að komst inn fyrir jól en það getur vel verið að það gangi ekki eftir, þá er það bara á milli jóla og nýárs, vonandi, krossið fingur með mér .

Jólaundirbúningur verður af skornum skammti á þessu heimili sökum þess að ég veit ekki hvort við flytjum fyrir eða eftir jól. Bætum það bara upp að ári í nýjum húsakinnum , get ekki beðið eftir því .

Þetta er orðið gott í bili enda langur pistill.
Bið að heilsa ykkur öllum á fysta degi desember, bara 23 dagar til afmælis Helgu Dísar og jóla .
Fanney Bergrós, jólabarn.

Hæhæ,
Já, ég tek undir með Helgu Dóru, maður á margt að þakka fyrir.
Ég tek líka undir orð Söndru frænku um að maður er svo RÍKUR, á tvö heilbrigð börn, er með vinnu (eftir að fæðingarorlofi lýkur) og maðurinn minn líka og hús yfir höfuðið meira segja tvö .

Helga Dís er farin að segja orð og setningar og skilur allt og þá meina ég ALLT sem sagt er við hana, maður þarf að fara að passa sig. Við þurfum líka að fara að kaupa almennilega setu á klósettið fyrir hana því hana er farið að langa að setjast á klóið og segir til um að pissa og kúka. En aðalsportið í dag er að prumpa og segja "brumpa" og benda á bossann og svo kemur agalegt prakkarabros. Hún er söngkona hin mesta og erum við foreldrarnir búnir að ná ansi mögnuðum augnablikum á video þar sem hún syngur eins og herforingi lög eins og Allur matur og Afi minn og amma mín, svo við gleymum ekki Babú laginu um slökkvibílinn.
Hún er búin að vera lasin síðan á föstudag með einhverja hitavellu og kvef en það er að síga úr henni held ég. Hennar uppáhaldssjónvarpsefni er Lala - pó og Latibær og svo Ávaxtakarfan sem hún fékk frá lilla bró þegar hann fæddist. Þar syngur hún lagið sem Eva appelsína syngur um að punta sig, ég.... ætla.... að punta, punta, punta ..... o.sv.frv. algjör krúttíbína  Henni finnst skemmtilegast þegar pabbi hennar byggir flugvél eða hús úr legokubbunum hennar, hún elskar að leika með kubbana sína.

Litli kútur braggast vel og var búinn að þyngjast um 340 gr. 16 daga gamall. Hann fer aftur í mælingu á fimmtudag, það verður spennó að sjá hvernig gengur að þyngjast á þessari rúmu viku. Hann varð þriggja vikna á lau. og GUÐ MINN GÓÐUR hvað þetta er fljótt að líða. Hann er farinn að halda haus nokkuð vel og horfir mikið í kringum sig og spáir í hlutina á milli þess sem hann sefur, hann er ekki enn farin að brosa nema geiflur tengdar smá magapínu. Hann á svo erfitt með að ropa að það festist mikið loft í honum og þá er voðaleg magapína að angra hann. Ég hef verið búin að klappa á bakið á honum og strjúka upp og niður í klukkutíma og enginn ropi. En svo prumpar hann voðalega og kúkar MJÖG mikið. Svo mikið að bleyjurnar halda ekki og það lekur alltaf meðfram spóaleggjunum, enda ekki mikil einangrun komin á leggina ennþá hihi . Þannig að það er nánast pottþétt að ég þarf að þvo karrígulan kúk úr fötunum hans á hverjum degi... bara gaman . Ég prófaði meira að segja að skipta um bleyjutegund en það var samt ekki að virka á þennan ofurkraft eða halda betur við spóaleggina .

Ég er öll að braggast og farin að díla betur við einveruna, ég er ekki alltaf ein, Hafsteinn er farin að vera meira heima með okkur sem ég er að fíla í botn en þegar hann er ekki heima, hann þarf nú að vinna maðurinn, þá hef ég þó alltaf börnin til að tala við og stundum fær maður heimsóknir . Ég get endalaust hlegið að prinsessunni minni hún er svo mikill snillingur og prinsinum getur maður endalaust dáðst að . Ég er reyndar ekki nógu góð í bakinu enda frekar skökk þegar ég er að gefa en ég verð að bæta úr því svo maður verði ekki aftur fyrir því sem gerðist í dag... eins og sést í fyrirsögninni og glöggir lesendur átta sig á þá er þetta orð sjúkrabíll stafað afturá bak. Já mín var flutt á sjúkrahús með sjúkrabíl um rúmlega hálf fjögurleytið í dag með svona líka hræðilegan verk í neðarlega í brjóstkassanum, allan hringinn. Ég var að leggja í bleyti einmitt einar kúkabuxur þegar ég fæ svona hrikalegan verk við bringspalirnar sem leiddi allan hringinn. Hann er það óbærilegur og ég verð að leggjast inn í hjónarúm en get samt með engu móti legið í góðri stellingu, ég gat engan veginn staðið því þá jókst verkurinn og svo emja ég af verkjum. Sem betur fer var ég nýbúin að gefa stráksa svo hann svaf en Helga Dís var mjög óttaslegin um mömmu sína og Hafsteini leist ekki á blikuna þegar ég gat ekki andað djúpt og kófsvitnaði af verkjum. Hann hringdi á vaktlækni sem sagði honum að hringja í heimilislækninn og hann gerði það og fékk beint samband inn til Þóris sem fékk lýsingu frá Hafsteini á hvernig ég var, ég gat ekki talað ég var svo kvalin og Þórir spurði hvort ég treysti mér út í bíl og Hafsteinn spurði mig en það var ekki séns ég gat ekki staðið upp. Þá sagði doksi ég sendi bara sjúkrabíl eftir henni. Mér fannst sjúkrabíllinn lengi á leiðinni en hann var í allra mesta lagi 5 mínútur . Svo komu þessir kjúklinga sjúkramenn, varla eldri en 25 hvor og að sögn Hafsteins gekk eitthvað illa að koma börunum inn enda kannski ekki mikið pláss hérna í Einholtinu þannig að ég vippaði mér framúr með herkjum og fór út á stétt þar sem ég átti að leggjast á börurnar og mér var skutlað inn í sjúkrabílinn. Þá sagði Hafsteinn mér að Helga hefði verið ansi skelkuð að sjá það en hann sagði henni að ég væri að skoða babú bílinn fyrir hana, þá jafnaði hún sig aðeins . Svo vorum við rétt lögð af stað, ég ýminda mér að við höfum verið komin að hringtorginu þegar púff verkurinn gufaði upp. Þá var ég búin að vera með viðstöðulausan verk í ca. 30-40 mín. Þá var ég búin að lýsa verknum sem verri en að fæða barn . Ég sagði að þeir gætu bara skutlað mér heim aftur þetta væri horfið. Sjúkrabílamennirnir vildu láta lækni kíkja á mig svo við héldum áfram. Þegar á spítalann var komið eignuðu þeir sé lækninguna á mér sem var allt í lagi . Þá tók að sjálfsögðu við bið og við biðum eftir lækni í ca. tvo tíma eða um kl.17:50, þá var mér ekki farið að standa á sama og ég var við það að koma mér út enda fannst mér að kútur þyrfti að fara að fá að borða en í þeim hugleiðingum þá kom læknir og bankaði og potaði í mig og tók skýrslu og sjúkdómsgreiningin Millirifjagigt. Má ekki taka bólgueyðandi lyf útaf litla kút svo hann ráðlagði hreyfingu og slökun og að reyna að koma mér vel fyrir þegar ég er að gefa kút. Taka verkjalyf ef ég finn svona aftur og reyna að slaka á því verkurinn gengur yfir. Tengdó voru hér á meðan Hafsteinn kom uppá sjúkrahús og þau hugsuðum um gullmolana á meðan á þessu stóð, þau voru þvílíkt yndisleg, Lúlli að leika við snúlluna og Lilla að hugsa um prinsinn.
En mikið ofboðslega má maður vera heppinn að vera heilsuhraustur og ekki þurfa að fara oft á sjúkrahús vegna einhverra kvilla.

Já þetta var sagan í dag.... ég bið ykkur vel að lifa og læt fylgja með að mér líður vel, stíf í bakinu en er að reyna að passa mig á hvernig ég sit, stend, held á Helgu og litla kút (hann er reyndar svo léttur) og hvernig ég er þegar ég gef honum. Andlega líðan fer batnandi með hverjum deginum (var reyndar ekkert voðalega slæm, smá grátur (2x) yfir því að vera ein með krílin) en Hafsteinn hefur verið duglegur að styða mig sem er ómetanlegt . Og þá leyfi ég líka bara heimilinu að sitja á hakanum ef ég hef ekki orku til að taka til hendinni, þá koma þeir sem koma í heimsókn bara í stíuna mína, það verður að hafa það .

Ekkert stress, verið hress og bless í bili.
Fanney Bergrós, endalaust hamingjusöm og þakklát yfir því hvað ég er RÍK að eiga ást, hamingju og umhyggju frá og fyrir fallegu fjölskyldunni minni.

Hæhæ,
Þetta krepputal er alls ekki gott fyrir nýbakaða móður sem er líka að byggja . En ef ég leyfi mér að velta mér uppúr þessu þá væri ég grenjandi hérna allan daginn. Kallinn er líka duglegur í húsinu okkar en þá á móti er hann ekki heima hjá okkur í staðinn sem er erfitt en við verðum að bíta í það súra og hlakka til að fá það sæta á endanum .

Helga Dís tekur vel á móti litla kút og vill helst halda á honum og kyssa og kjassa endalaust og gefa honum "dótt nús" (stórt knús). Hún var svolítið lítil alla síðustu viku og átti erfitt uppdráttar en eftir góða helgi þar sem mamma var meira til staðar fyrir hana þá mætti gamla góða Helga Dís á leikskólann í gærmorgun . Ég er líka farin að setja litla kút inn í herbergi á meðan hann sefur og þá erum við Helga í góðum gír saman þegar hún kemur heim af leikskólanum . Þá sættir hún sig líka betur við það að þegar hann vaknar á þá þurfi að gefa honum. Þegar hún heyrir í honum þá spyr hún alltaf "aknaðö" og meinar vaknaður? og þá veit hún að hann er svangur og mamma þarf að gefa honum.

Litli kútur braggast vel og líður vel, hann borðar, sefur og er bara yndislegur. Hann tekur snuddu og þegar hann er búinn að borða og ég er viss um að hann hafi fengið nóg þá læt ég hann hafa snudduna ef hann er að leita ennþá því þá er það bara mallinn sem er eitthvað pínu að angra  hann. Ég er stálhraust líkamlega en aðeins viðkvæmari andlega sem er svosem eðlilegt .

Myndir af gullmolunum mínum.

Kútur litli vikugamall.


Stolt stóra systir fékk að halda á litla kút.

Það er komin síða fyrir prinsinn, www.prinshafsteinsson.barnaland.is og sama lykilorð og hjá Helgu Dís, Helga Dís er með www.helgadis.barnaland.is er að vinna í því að setja inn september albúm hjá prinsessunni. Sendið t-póst á fanneybergros@internet.is ef þið viljið fá lykilorðið. Þetta er orðið gott í bili.

Heyrumst síðar,

Fanney Bergrós, viðkvæm en hamingjusöm

Hæhæ allir sem hér kíkka inn.

Prinsinn kom í heiminn kl.14.27, þann 27.09.'08. Ekki alveg að hlusta á mömmu sína með dagsetninguna blessaður. Hann var 54 cm og 13,5 mörk. Hann er vær og góður en svolítill næturgali, svo er hann að koma mjólkinni í gang hjá mér en hann er ekkert gráðugur vill bara kúra við og taka sinn tíma í þetta.
 
Það urðu voðaleg viðbrigði fyrir prinsessuna að fá bróður og er hún mjög áhugasöm um hann og vill fá að sjá og snerta mikið og svo hermir hún eftir honum með hljóð og munnsvipi . Hún er ekki alveg að gúddera það að sofa í sínu rúmi þegar við erum öll hinum megin við ganginn en þetta verður sennilega svona fyrsta vikan, hún lærir vonandi að útiloka hljóðin í honum og sofa vært þó ekki hafi hún gert það í nótt. Ég þarf bara að þjálfa drenginn í að sofa á næturnar . Hann er byrjaður að gala eftir mat og best að fara að sinna kút.

Það eru komnar myndir á síðuna hennar Helgu Dísar, sem teknar voru fyrsta daginn og svo af Helgu Dís að herma eftir óléttri móður sinni.

Ég bið alla þá sem fengu ekki sms frá mér um fæðinguna, sem ég hefði allajafna sent þ.e.a.s. afsökunar, ég er ekki með nýja símann minn, hann er í viðgerð og öll símanúmerin eru í honum svo ég er bara með gamlan síma og þeir sem fengu sms eru bara svo heppnir að hafa verið í sambandi við mig undanfarnar tvær vikur og fengu því sms .

Ein mynd af prinsinum í lokin. Hér er hann splunkunýr og ég að klæða hann ca. hálftíma eftir fæðinguna.


Farið vel með ykkur.
Fanney Bergrós, hamingjusöm tveggja barna móðir hihihihihi

Hæhæ allir,

Það er enn ekkert að gerast. Smá verkir en ekkert alvarlegt en þó gæti verið byrjun á einhverju... aldrei að vita. Ég ætla samt ekki að eiga 26.sept. það er ekki á planinu. En þetta gæti komið um helgina þó veit maður ekki.... . Það sem hrjáir mig að öðru leyti er mikið kvef og slímhósti og ekki gott að þurfa að draga andann djúpt þá brestur á hóstakast.... ohh well . 

Helga Dís fékk ælupest núna í kvöld  og er búin að æla einum 6 eða 7 sinnum síðan kl.9, vaknaði til að æla og sofnaði svo strax aftur, alveg búin á því og fékk að lokum kók núna kl. hálf 12 og heldur því enn niðri svo vonandi fær hún einhverja hvíld rófan litla.

Jæja smá svona innskot frá okkur þar sem við erum enn vakandi að bíða eftir næstu spýju sem vonandi verður ekki (krossi fingur).

Þar til næst,
Fanney Bergrós og bumbus að hjúkra snúllunni okkar

hæhæ,

Allt gott að frétta, blóðþrýstingur og prótein í góðum gír, smá bjúgur en allt í lagi samt.
Fór í skoðun í morgun og bumbus ekki enn búinn að skorða sig, komin með 1-2 í útvíkkun samt og leghálsinn byrjaður að styttast en það getur tekið langann tíma að gerast. Hulda ljósa hreyfði aðeins við krílinu og ég hef fundið fyrir óþægindum í dag fljót að þreytast í baki og grind við minnsta labb en það er samt ekki komnir neinir verkir sem hægt er að segja að séu verkir á nokkurn hátt engin regla og ég er stálhress.

Ég er búin að gera vögguna klára og búin að þvo taubleyjur og þvottapoka. Á eftir að taka til í töskuna sem ég fer með á spítalann og fara í gegnum fötin frá Silju og Söndru og svo það sem ég á frá Helgu Dís og þvo það sem ég vil. Fékk líka samfellur frá Dísu frænku í dag sem ég á eftir að þvo. Mig vantar að kaupa ullarnærbol fyrir krílið svo ég geti sett það í ull strax á fæðingardeildinni og finna heimfarafötin sem Helga fór í heim. Ég fer í þetta allt í þessari viku enda kemur bumbus ekki fyrr en á þriðjudag eða miðvikudag í næstu viku . Það á líka eftir að sækja barnabílstólinn uppá loft og þvo utan af honum og ganga frá skiptiborðinu, en ég er búin að færa öll fötin hennar Helgu úr skiptiborðskommóðunni og í fataskápinn. Þannig að já það er ýmislegt sem á eftir að gera..... .

Helga Dís er aðeins farin að finna fyrir því að við séum að brýna fyrir henni að nú sé að koma lítið barn og við tölum um barnið á hverjum degi og biðjum hana að sýna okkur hvað litla barnið sé. Ég er búin að kaupa leikfang og Ávaxtakörfuna á DVD sem við ætlum að pakka inn og fara með á fæðingardeildina og gefa Helgu Dís frá litla barninu. Ég var að heyra að best væri að þegar hún kemur með pabba sínum að þá sé enginn annar í heimsókn og mamma sé ekki að halda á barninu, heldur skoðum við (Helga Dís og mamma) saman litla barnið í vöggunni og við ætlum að hafa það þannig. Svo ætlar Helga Dís að gefa litla barninu gjöf. Maður verður að hugsa um litlu prinsessuna líka. Hún er víst aðeins farin að fá smá bakslag á leikskólanum (sem mátti búast við) vill ekki leika sér úti heldur bara halda í hendina á fóstrunum og ef þær þurfa að stökkva til og sinna einhverjum öðrun börnum þá stendur hún bara og skælir litla rófan, Eva frænka er líka í fríi þessa viku svo hún getur ekki hlaupið til hennar. Ég reyni að fara með henni í labbitúr þegar hún kemur heim eða ef hún er búin að fara út á leikskólanum þá sest ég inn á gólf í herberginu hennar og við skoðum bók saman eða ég er bara þar á meðan hún leikur sér að dótinu sínu svo við eigum smá stund saman.

Húsbyggingin er í smá pásu á meðan við erum að reyna að sinna Einholtinu, það er komið á sölu og sett á það 20,8 millj. hjá Byggð. Í sambandi við Fossatúnið þá erum við að bíða eftir gluggáfellum sem smiðurinn okkar er að beygja fyrir okkur svo við getum klárað gluggana til að hafa þetta alveg vatnshelt áður en við förum að setja ull inni. Hafsteinn vill klára gluggana áður en við förum að ulla. Vorum að panta gólfflísar í dag frá Múrbúðinni sem heita Sunrise beige og verða alls staðar nema á baðherbergi og bílskúr, á baðinu verða gráar flísar í sama stíl og hinar og svo bara ódýrar bílskúrsflísar. Þá er bara að eftir að finna veggflísar á baðið það verður vonandi ekki mikið vandamál.

Jæja þetta er orðið ansi gott blogg og endilega kommentið elskurnar, plís .

Þar til næst, Fanney Bergrós og bumbus sem kemur örugglega 1. eða 2. okt.

Hæhæ,
Jæja það eru ekki nema 6 dagar eftir og krílinu líður vel í sundlauginni sinni og er ekkert á leiðinni út. Er ekki búið að skorða sig en er á leiðinni þarna niður, það finn ég helst á lífbeininu sem ég finn til í svona við ýmis átök.
Blóðþrýstingurinn er fínn og heilsan góð, þreytan aðeins farin að segja meira til sín og bjúgur aðeins að byrja að setjast á mig en annars líður mér vel og engir verkir ennþá.
Ég er búin að vera að byrja á að undirbúa fyrir krílið, var að versla sæng og kodda handa Helgu svo ég geti fengið dúnsængina. Fengum vöggu hjá Hafeyju systur Hafsteins sem krílið verður í. Það er eftir að taka niður barnastólinn af háaloftinu og þvo utan af hinum og svo á ég bara eftir að fara í gegnum fötin hennar Helgu og fötin sem Silja mágkona og Sandra frænka létu mig hafa og týna það sem ég vil þar úr.

Helga Dís lærir meira og meira á hverjum degi á leikskólanum. Hún syngur mikið og eitt af hennar uppáhaldslögum er afi minn og amma mín, þá syngur hún " afi..... bakka búúúúa..." svo syngur hún Stubbalagið "... Laalaaa... Póóóó...." og svo segir hún "dónt hnúús" sem þýðir auðvitað stór knús og rýkur svo á mann og faðmar ógurlega . Þegar við spyrjum hana hvar litla barnið sé þá bendir hún á bumbuna á mér og brosir og þegar hún sér myndir af litlum börnum þá segir hún ææjiiiiii. Þegar við segjum henni að passa sig á bílunum þá segir hún burra oooó og hleypur til manns. Hún hefur alveg ógurlega gaman af að vera úti og hlaupa enda orkubolti mikill og gleðigjafi enn meiri.

Húsið gengur vel það er alveg að verða búið að klæða húsið að utan og þá er bara eftir að ganga frá þakinu og gluggum og fokeldisvottorðið verður gefið út. Þá getum við líka farið að ganga frá okkar íbúð og undirbúa hana undir ull og klæðningu og herbergjaskipan, þurfum líka að fara að hitta rafvirkjann og fá hugmyndir að raflögn, ljósum og þess háttar í húsið.

Jæja ekki meira í bili,
Þar til næst, Fanney Bergrós og bumbus ánægður í sundlauginni sinni

Sem þýðir að það eru, samkvæmt sónar, tæpar tvær vikur eftir.

Hellú evríbodí,

Allt fínt að frétta, krílið ekki enn búið að skorða sig en er komið í höfuðstöðu, enda potar það sér upp við rifbeinin með rassinn. Helga Dís var búin að skorða sig á 36 viku svo þetta verður ekki alveg eins... Blóðþrýstingurin fer hækkandi efri mörkin en neðri mörkin eru lægri en í síðustu skoðun svo það þarf ekki að hafa áhyggjur af honum. Enginn bjúgur sem heitir og ég hef lést um eitt kíló. Þannig að samtals hef ég bætt á mig einu kílói það sem af er á þessari meðgöngu og er ég bara sátt við það enda ekki annað hægt . Besti megrunarkúr sem ég hef kynnst . Smá samdrættir byrjaðir en verkirnir sem ég talaði um síðast vörðu bara í einn dag og svo hef ég ekki fundið fyrir verkjum sem heitir. Þreytan hins vegar farin að segja verulega til sín....

Helga Dís er búin að vera með hita síðan á laugardagskvöld og það voru víst fleiri börn á leikskólanum lasin þannig að þetta er einhver leikskólaflensa, hún er þó að jafna sig að ég held. Fer kannski í leikskólann á morgun, ég sé til hvernig hún verður stemmd í fyrramálið en málið er að hún er alveg eins og hún á að sér að vera nema bara með hita .

Nú fer Rikki bróðir Hafsteins að klæða húsið að utan og þá getum við farið að sækja um fokheldislán og farið að greiða skuldirnar sem við erum komin í vegna byggingarinnar . Við ætlum að fara að drífa í að setja Einholtið á sölu og sjá hvort eitthvað er að gerast á þeim markaði.

Jæja það var ekki fleira í bili, vildi bara aðeins láta vita af mér.

Fanney Bergrós að bíða eftir bumbus .

Hæhæ,
Hér er allt það besta að frétta. Get þó ekki neitað því að óléttan er farin að láta finna fyrir sér. Lífbeinið og grindin orðin teygð og tognuð og krílið að pota sér þangað niður. Liggur víst með hausinn niður, bakið að mínu baki og rassinn upp við bringspalirnar, sparkar þ.a.l. beint út í loftið á miðjum maganum . Ég er aðeins farin að finna fyrir þreytu enda, tekur við vinna eftir þessa vinnu þ.e. að vera með snúlluna okkar og svo neglur þess á milli, er reyndar búin að vera í fínu fríi þessa vikuna, búin að vera með tvær í vikunni og svo er bara ein í kvöld og svo frí fram á mánudag. Alveg ágætt bara. Ég ætla að reyna að vinna eins lengi og líkaminn treystir sér til, var þó með aðeins hærri blóðþr. núna en fyrir 4 vikum en ekkert til að hafa áhyggjur af svo fer ég aftur eftir 2 vikur og sé þá hvað blóðþr. segir. Smá prótein í þvagi og mjög lítill bjúgur, aðeins þrútin á morgnanna en er ennþá með alla hringana mína svo þetta er ekki slæmt.

Helga Dís er byrjuð á leikskóla og gengur bara vel. Hún unir sér vel að sögn fóstranna en ég þarf samt að rífa hana af mér á morgnana og setja hana í hendurnar á Kollu, Kolla hefur gott lag á henni svo hún er hætt að gráta þegar ég er komin úr augsýn. Ef einhver önnur fóstra er frammi þegar við komum þá er Kolla bara sótt sagt við hana "Kolla mín, Helga Dís er komin".

Þetta er skrifað 14.ágúst á afmælisdaginn hans pabba, eitthvað hefur breyst síðan þá.

Ég er hætt að vinna, náði takmarkinu mínu að vinna út ágúst, komin í veikindaleyfi enda ekki nema 3 vikur eftir í dag, fyrsti dagurinn sem ég er í fríi. Ég er nokkuð hress en það sem hrjáir mig er að ég er fljót að þreytast og er farin að finna vel fyrir grindinni og lífbeininu. Blóðþrýstingurinn fer hægt og sígandi uppá við en ekkert hættulegt ennþá, lítið prótein í þvagi og smá bjúgur farinn að gera vart við sig sem ég vinn á með melónum. Fæ mér þá melónu eftir kvöldmat sem gerir nóttina hundleiðinlega en ég er þá ekki ofurþrútin á morgnanna í staðinn. En það hvimleiðasta af þessu öllu er hel#*%$ brjóstsviðinn, má ekki orðið borða nokkurn fjárann þá er ég komin með sviða sem svíður niður í belginn sem fer enn stækkandi .
Barnið er komið í höfuðstöðu en ekki svo djúpt niður í grind og liggur nú með bakið fram finnst mér en þó vel til hægri, enda þegar koma samdrættir og kúlan harðnar þá er hún voðalega skökk og belgist út hægra megin enda bara fylgja vinstra megin og allt lint þar .

Helgu Dís gengur vel á leikskólanum og það er ekkert vesen lengur að fara með hana á morgnanna enda Eva frænka alltaf til taks og hún fer til hennar alveg óhikað. Hún er farin að gera mikið af hreyfingum við lög sem við erum að reyna að syngja fyrir hana til að sjá hvað hún hefur lært. Kann t.d. Kalli litli kónguló og er stundum að syngja það hér heima. Þá syngur hún " lóguló, lóguló" og gerir hreyfingarnar. Svo ef ég syng fyrir hana Stubbalagið þá bíður hún eftir að geta sagt "HALLÓ" hátt og snjallt í endann og vinka í leiðinni, þar finnst henni afar skemmtilegt . Það sem við foreldrarnir þurfum að gera er að læra lögin sem sungin eru á leikskólanum svo maður geti sungið með henni um helgar það er svo gaman að sjá hvað hún er dugleg að gera hreyfingarnar.
Helga Dís borðar alveg hreint ótrúlega vel á leikskólanum og Eva segir að það sé alveg rosalega gaman að gefa henni að borða. Hún sefur þó ekki nema mesta lagi klukkutíma en það er allt í lagi því hún er þá orðin svo þreytt á kvöldin þegar kominn er háttatími hér heima að hún er fljót að sofna. Hún fer að sofa milli 8 og hálf 9 og sefur yfirleitt vel en núna undanfarnar nætur hefur hún verið að rumska aðeins of mikið enda mikið um að vera um helgar og hún sefur lítið þá á daginn, þá er hún frekar pirruð í svefni á nóttunni en maður verður bara að passa að halda rútínunni.

En að byggingunni, Þetta gengur svona líka glimrandi vel, allir gluggar og hurðir komnar í og þakrennan komin á fyrir austan hús (verður reyndar bara þar). Næst á dagskrá er að klæða húsið að utan og ganga frá þar. Áður en haustar almennilega þá ætlum við að grófjafna lóðina og ég að fá snúrustaur þegar búið er að því, því ég vil ekki vera snúrurstauralaus þegar við flytjum inn, vonandi í des. Við stefnum á það allavega .
Við erum farin að spá í gólfefni og erum að reyna að finna fallegar ljósdrappaðar flísar sem hafa þó nokkrar yrjur í sér svo það sjáist ekki neitt voðalega mikið á þeim. Við erum líka farin að hugsa fyrir ljósum en þó ekkert farin að ákveða neitt nema það að vera með halógen lýsingu í öllum herbergjum og dimmer þá allstaðar. Mig langar samt að fá veggljós í barnaherbergin svo hægt sé að setja upp sæt ljós fyrir krílin. Svo erum við búin að skipuleggja hvar næturlýsingin verður á ganginum og erum ákveðin í hvernig innréttingar við ætlum að hafa í eldhúsi, á baði, svefnherbergjum og í þvottahúsinu, þær verða allar keyptar í IKEA og frekar langt síðan við ákváðum hvernig þær ættu að vera eða í febrúar til mars . Við erum bara að fínpússa þær núna í samræmi við nýja IKEA bæklingin og fá frekari fínpússandi hugmyndir.

Jæja þá er þetta orðið gott í bili. Ég fer að setja inn myndir á síðuna hennar Helgu Dísar frá ágúst og svo ætlum við að setja inn byggingarmyndamöppu þar líka, svona aðeins til að monta okkur og að sjálfsögðu að sýna ykkur tilvonandi heimilið líka auðvitað .

Bless í bili, Fanney Bergrós og bumbukrílið sem styttist í

hehe samkvæmt sónar, þ.e., en ég ætla að bíða þangað til í okt og stefni á 02.10.08. Það væri alveg samkvæmt formúlunni þ.e. Helgu Dísar formúlunni, 10 dagar fram yfir settan dag.

Hæhæ, btw

Við höfum aðeins verið að velta fyrir okkur nöfnum en erum svo úti á þekju með það, einn daginn langar okkur að hafa það sterkt og eitthvað sem erfitt verður að stytta en svo erum við á annarri átt hinn daginn. Helga Dís er ljúft og íslensk nafn og kannski væri flott að hafa mótvægi sterkt og voldugt nafn á móti eða bara hafa þetta ljúft og íslenskt líka. Við vitum það kannski þegar við sjáum krílið hvað hentar. Sáum það allavega með Helgu, hún gat bara ekki heitið neitt annað en Helga. Endilega komið með uppástungur þær eru vel þegnar.

Krílinu líður vel held ég, spriklar allavega voðalega og gerir engann mun á degi eða nótt. Þetta er þó ekki þannig að það sparki á óþægilega staði. Það liggur með hausinn upp við hægri rifbeinin og bakið að vinstri hlið, jújú ég finn stundum spark í blöðruna en annars eru bara hreyfingarnar á hægri hliðinni og niður í botninn á leginu. þannig að það er ekkert að angra mig.  Hér er ein bumbumynd.



Ég er orðin frekar lúin en það er ekki vinnan sem er að þreyta mig heldur orkuboltinn minn litli sem vill fá athygli mömmu sinnar og sýnir mér dans og hoppar og hoppar enda orðin svo góð að hoppa þessi skotta okkar. Það tekur smá orku að vera ein með hana eftir vinnu af því að Hafsteinn er búin að vera að vinna svo mikið fyrir okkur í húsinu okkar og því ekki heima. Það eru alltof margir að pressa á mig að fara að hætta að vinna en ég er ekki tilbúin til þess, mig langar að vinna eins lengi og ég treysti mér til. Ég læt líkamann minn um að ráða þessu en ekki fólkið í kringum mig. Þau segjast vera farin að sjá bjúg á mér (sem er reyndar rétt í sumum tilfellum en ég vinn bug á því með melónum) og svo er ég þreytt en eins og áður sagði þá er það ekki vinnan sem þreytir mig heldur snúllan mín, en ég vil ekki kvarta undan henni því hún er svo dásamleg og góð og glaðlynd og frábær í alla staði. Helga Dís snúlludúllan mín. Set eina mynd af skottunni sem er orðin svo stór.


Hún er ekki með opna buxnaklauf hehe.

Hún er farin að segja svo mikið og alltaf að bætast við orðaforðann, gó er skór, húa er húfa, jæja segir hún svo þegar við erum á leið út um dyrnar. Ís þegar hana langar í ís og svo er hún loksins farin að segja mamma og þarf að vanda sig mikið ef hún vandar sig ekki kemur bara mmma. Pabbi er bara Babbíííí og svo margt margt fleira en þetta er svo dásamlegat að heyra í henni.

Að húsinu okkar, þetta gengur glimrandi vel. Það er verið að klára þakið, þar verður dúkur á og er verið að leggja lokahönd á hann. Svo getum við farið að loka gluggum í þessari viku með plasti, en til að þetta verði fokhelt þá þarf að loka gluggum og hurðaropum og klæða svo með utanhússklæðningunni sem við ætlum að hafa á. Það er viðhaldsfrí viðarlíkisklæðning. Hún verður dökkgrá á húsinu og ljós á þakhattinum. Við fáum ekki hurðar og glugga fyrr en uppúr miðjum ágúst og það er líklega eins með klæðninguna. En við erum að fara í dag og skoða heimilistæki í Ljósgjafanum. Ef við verslum öll tækin þar, bæði við og Jón og Gunna þá getum við kannski fengið betri afslátt. Reynum að sjálfsögðu að kría út eins mikinn afslátt og hægt er  
Rikki smiðurinn okkar, bróðir Hafsteins, er kominn í örugglega langþráð sumarfrí. Hann er sko búinn að bjarga þessu verki gjörsamlega, við værum aldrei á þeim stað sem við erum á núna ef ekki væri fyrir hann. Þvílíkt yndislegur sem hann er og duglegur, við flytjum vonandi inn fyrr en seinna og það er mikið til Rikka að þakka. Ég ætla nú samt ekki að gera lítið úr vinnunni sem tengdapabbi, Hafsteinn og Jón hafa lagt í bygginguna því það er náttúrlega verðmætasköpun hjá þeim og okkur. Við erum að skapa okkur rosaleg verðmæti með svona mikilli eigin vinnu, það segir sig auðvitað sjálft.
Ég reyndi að setja inn myndir en tölvan mín fraus á þeim svo ég set aftur inn seinna myndir.

Jæja þetta er að verða gott í bili held ég. Bið að heilsa ykkur og njótið nú þessara næstu sumardaga því veðrið á að vera voðalega gott

Ég vil óska Dísu og Ella formelga til hamingju með gullmolann Ísak Örn. Set inn eina mynd af honum, hann er svooo sætur litli snúðurinn aaaaawww


Bless í bili,
Fanney Bergrós og sprellifjörugt spriklukríli

Hæhæ,

Jæja þá er húsið risið og verið að vinna í því dag og nánast nótt. Ég sé t.a.m. ekki manninn minn fyrr en eftir kl.11:00 á kvöldin þegar ég er með neglur, þá sé ég í hælana á honum rétt fyrir kl.9:00 og loka svo hurðinni inn í naglaherbergi. Ef ég er ekki með neglur þá sé ég hann kannski kl.9:00 ef ég er heppin. En þetta er eitthvað sem þessu fylgir en það er ekkert sem segir að ég þurfi að vera voða glöð með þetta á meðan það varir, ég bölsótast yfir þessu bara hérna á síðunni minni hehe .

Krílið lætur aldeilis fara mikið fyrir sér og það má með sanni segja að ekki fann ég svona mikið fyrir Helgu Dís, hún lá með bakið út á við en þetta kríli liggur til hliðar með hausinn akkúrat á maganum, enda er ég MJÖG lystarlítil og búin að missa þetta eina kíló sem ég var búin að bæta á mig, sem var líklega bara vökvi. Þannig að ég hef ekkert þyngst á meðgöngunni en er alltaf svöng og hef svo ekkert pláss þegar ég ætla að borða eða lyst á nokkrum sköpuðum hlut, fullur ísskápur af mat sem mig langar ekki í. Ég er að reyna að borða ávexti en mig langar varla í þá heldur.... mig langar ekki einu sinni í nammi hvað finnst ykkur um það, nammigrísinn sjálfur. Annars er ég komin rúmar 29 vikur og þetta gengur vel fyrir utan ofantalið.

Við Helga Dís erum búnar að vera lasnar. Helga Dís með hita á kvöldin fös. lau. og sun. kvöld og þá engann smá, fór hæst í 39.7. En svo er hún búin að jafna sig núna. Þetta er sennilega 18 mánaða sprautan sem hún fór í á föstud. fyrir tæpum tveim vikum. Ég hins vegar var með niðurgang og uppgang og slappaðist helling við það og missti allan bjúg sem var einhver. Þornaði nánast upp að mér fannst. Svo er ég alltaf í svitakasti og er EKKI að fíla það. Þarf að biðjast afsökunar við hvern naglakúnnan á fætur öðrum enda alltaf að þurrka ennið, svo ósmekklegt . En þetta fylgir víst.

Ætla að fara að setja myndir af húsrisinum hér inn og svo myndir á síðuna hennar Helgu Dísar og svo sem eins og eina bumbumynd af fitubollunni.

Fann eina mynd af húsinu okkar á síðunni hennar Birgittu mágkonu. Við erum í fjarlægari endanum, þar sem sandhóllinn er fyrir framan. Þetta verður að duga þangað til að ég set inn betri myndir.



Þar til næst,
Fanney Bergrós og bumbukrílið

p.s. sendi hríðarstrauma til Dísu frænku, vænti þess að ekkert sé að gerast þar sem maður hefur ekkert frétt en Gústa jr. vill fá krílið á morgun enda á hún afmæli þá og ég óska henni jafnframt til hamingju með það.

Halló þið sem kíkið stundum við,

Fyrst af bumbukrílinu, því líður vel og sparkar bara í mig hægra megin enda liggur það með rassinn niður og hausinn upp við maga í átt að hægri hlið, eða það finnst mér allavega. Plássið fyrir matinn er allavega ekki mikið, kannski sem betur fer, maður má ekkert við því að bæta á sig . Ég hef ekki þyngst nema um 500 gr. svo þetta gengur vel . Ég er þó farin að finna fyrir grindinni við hemilisstörfin enda eru þau af skornum skamti unnin á heimilinu. Blóðþrýstingurinn hefur lækkað mikið í fríinu en ætli hann fari ekki bara aftur upp þegar ég byrja að vinna sjáum til. Ég er skrifuð inn 22.sept.

Ég er búin að vera í fríi í þrjár vikur og fer að vinna á mánudaginn sem ellikelling eða 31 árs, . Það er s.s. kaffiboð hjá okkur vegna afmælis míns á sun. en ég er ekki búin að ákveða hvenær kaffið verður, sennilega um kaffileytið eða 4 .

Helga Dís er farin að sofa í sérherbergi og hefur það gengið alveg glimrandi vel, fyrstu nóttina vaknaði hún um 3 og sofnaði aftur um 5. Næstu nótt þar á eftir vakti hún ekki nema kortér og svaf svo alla þriðju nóttina. Hún rumskar yfirleitt um miðnætti og vaknar svo um sex-sjö leytið og þá sækji ég hana og hún fær að kúra hjá okkur til hálf 8-8. Herbergið er innréttað fyrir prinsessuna og hún unir sér vel þar. Á mánudag verða liðnar tvær vikur frá því að við færðum hana yfir og þetta var bara ekkert mál. Hún er líka víst á rétta aldrinum til að fara í sérherbergi. Það er talað um 6-9 mánaða eða 16-18 mánaða Helga Dís verður einmitt 18 mánaða á þriðjudaginn svo það var ekki seinna vænna. Hún  fékk svo pláss á Flúðum og byrjar þar 11.ágúst. Við sóttum um Naustatjörn en þar var fullsetið eða það sóttu 52 börn um 27 pláss og börnin sem komust þar inn eiga eldri systkini á leikskólanum. Ég er samt alveg sátt við Flúðir eftir viðtalið sem við áttum við leikskólastjórann. Eva Dögg frænka verður líka deildarstjóri á deildinni hennar Helgu Dísar og svo er Harpa vinkona með Kristbjörgu Evu á sama stað svo ég þekki einhverja þarna. Vont að þekkja engan á leikskólanum sem barnið þitt er að fara á. Tíminn hennar Helgu Dísar verður frá 8-14, þá nær hún morgunmat, hádegi og hvíldartíma. Svo var ég að spá í að fara venja hana á að kúka í klósettið en ég veit ekki alveg hvernig ég fer að því... ég grufla mig fram úr því . Hún er farin að spjalla alveg helling og maður skilur alveg eitt og eitt orð, ef hún er hrifin af einhverju sem hún sér þá segir hún "vááá,vááá, sjááá, sjááá", sem er auðvitað vá, sjáðu. sí þýðir ís og svo segir hún auðvitað óspart "deiii" eða "eigh" og hristir höfuðið. Það er auðvitað nei. Hún segir "gega" sem er Helga og "bóbe" sem er Róbert, svo segir hún "opa" sem er að hoppa og svo segir hún bara hljóðin sem heyrast í dýrunum frekar en að segja orðin eins og þegar hún sér kisu segir hún mááááá og voffa segir hún "off off" og hljóðin í farartækjum eins og slökkvibíl það er "babú, babú" og traktor og bílum eru bara skilgreind með "bvurra", hún segir reyndar "fuvel" sem er flugvél og sýnir okkur hvernig hún flýgur um loftið. Hún er farin að skilja allt sem sagt er við hana en hún er ekkert of hlýðin samt og á það til að setja upp þvílíkan svip sem segir okkur allt "ég er ekkert að fara að hlýða ykkur ef þið haldið það"-svipur. Hún syngur mikið og spjallar helling við mann og sérstaklega pabba sinn þegar hann kemur heim, þá kemur alveg sagan hvað hún var að gera um daginn. Tengdamamma er enn með hana á morgnanna enda er hún alveg handalaus án Helgu Dísar ef hún er líka með Róbert Smára frænda hennar. Hún vill hafa þau bæði en ekki annaðhvort, þau eru svo góð saman og Helga Dís er svo voðalega góð við hann kyssir, kjassar og klappar honum, hann er líka voða góður við hana en er meiri óviti enda rétt orðinn eins árs 1.júní og rífur stundum heldur fast í hárið að henni eða hangir í henni en hún kann að snúa hann af sér enda þekkjast þau orðið svo vel.

Húsbyggingin gengur vel. Verið er að undirbúa svo hægt verði að steypa plötuna og það er næstum búið að smíða útveggina, einungis norður stafninn eftir. Tengdapabbi segir að húsið verði orðið fokhelt 14.júlí. Við skulum sjá til með það en það er gott að hann hefur eitthvað markmið enda veit hann miklu betur hvar við erum stödd í ferlinu heldur en við. Hafsteinn er í þessu öllum stundum eftir vinnu og kom t.d. ekki heim fyrr en um hálf ellefu í gærkvöld. Það er erfitt að hafa ekki kallinn með sér í fríi en hann fer væntanlega í fríi í ágúst og svo í fæðingarorlof í okt. og nóv. 50% og svo allan des. og geymir svo einn mánuð til næsta sumars. Það verður mjög ljúft. Ég hef hugsað mér að taka 1 ár í orlof og láta þá Hafstein bara hafa skattkortið mitt af því að ég verð að öllum líkindum ekki með há laun, þar sem ég hef ekki unnið mikið og næ ekki einu sinni ári í vinnu á milli fæðingarorlofa. Við eigum reyndar eftir að skoða þetta betur. Ég verð samt sem áður enn með neglurnar svo endilega komið í neglur stelpur og verið flottar um hendurnar í sumar. Ekkert ljótara finnst mér en að sjá nagaðar eða ljótar neglur enda er það það fyrsta sem ég tek eftir hjá konum eftir að ég fór að læra þetta, það bara er þannig .

Jæja ég man ekkert meira í bili svo þangað til næst,

Fanney Bergrós og bumbukrílið í sumarfíling .

Hæhæ,
Við Gunnfríður lögðum upp í svaðilför til London í kringum sumardaginn fyrsta. Gunnfríður að fara til London í fyrsta skiptið en ég í mitt fimmta. Við lögðum af stað uppúr fjögur og vorum komnar á völlinn rúmlega 5, þá beint í röð sem myndast hafði þrátt fyrir að ekki væri byrjað að bóka í flugið. Þetta gekk allt smurt fyrir sig þegar bókunin byrjaði og við tók bið í fríhöfninni. Gunnfríður keypti sér bók og við báðar eitthvað að drekka.
Flugið var gott og engin ókyrrð eins og oft vill verða.
Við vorum lentar á fínum tíma í London og tókum leigubíl á hótelið og komum okkur fyrir og slökuðum á í litlu holunni okkar hehe.
Svo fórum við að skoða okkur um og þá komumst við að því að við vorum alveg við Kings kross neðanjarðarlestarstöðina sem var enn betra þar sem við þurftum þá ekkert að labba langt í lestina. Þessi dagar liðu því í rólegheitum og slökun, eitthvað sem við þurftum báðar á að halda. Borðuðum góðan mat fyrir utan eitt skipti, vorum hrifnastar af Ítölsku veitingastöðunum enda mikið um fersk grænmeti með matnum þar. Besta matinn fengum við þegar við fórum á markað Covent garden, stórskemmtilegur markaður og þar var ítalskur veitingastaður sem var algjörlega frábær í einu orði sagt.
Við fórum á tvær sýningar, Grease sem var fínt en það skemmdi alveg fyrir okkur að það voru tvær breskar stelpur í kringum 20-25 ára sem lifðu sig inní leikriðið og héldu að þær væru leikendur því þær sungu SVOOOO hátt, þær sátu á næsta bekk fyrir framan. Skemmdu soldið upplifelsið. Svo fórum við á aðra leiksýningu sem var gjörsamlega frábær, draugaleikrit sem nefnist Woman in black, um konu sem ásækir fólk sem á lítil börn, mér leið ekki pent vel eftir það og sofnaði seint eftir ítrekaðar tilraunir hehe. Leikendur voru tveir báðir jafngóðir, leikmyndin mjög vel gerð og var sagan gjörsamlega frábær. Sé ekki eftir að hafa skellt mér á þetta leikrit.
Þessi ferð einkenndist af slökun og aftur slökun. Þegar við ekki nenntum út þá lágum við á herberginu og lásum bækur hihi, kláraði t.d. flugdrekahlauparann í þessari ferð. Snilldar bók. Sem dæmi um slökunina þá verslaði ég mér einn bra, tvennar buxur og einn jakka, og svo einar buxur og einn bol á Helgu Dís.
Við vorum komnar til Íslands á mánudag um þrjú eftir að hafa farið í gegnum fríhöfnina og þá skutlaði Gunnfríður mér á Rvk-flugvöll þar sem Sandra vinkona hélt mér á snakki þangað til ég fór í flug. Mikið ofboðslega var gott að koma heim og sjá fjölskylduna bíða eftir mér.

Krílið stækkar og stækkar og er farið að sparka duglega en þó ekki þannig að Hafsteinn finni fyrir því, enda vel bólstrað hjá mér . Við erum búin að fara í 20 vikna sónar og allt leit vel út. Ég er komin 21 viku og líður vel, pínu þreytt og grindin aðeins byrjuð að láta finna fyrir sér, enda maður ekki almennilega gengin saman eftir síðustu meðgöngu. Ég er skrifuð inn 22.sept. en vonandi lætur krílið bíða eftir sér í 10 daga eins og stóra systir, enda þufum við alveg örugglega á því að halda hihi .

Byggingin gengur enda tengapabbi rosalega duglegur að dunda sér þarna uppfrá fyrir okkur.  Hafsteinn fer auðvitað uppeftir þegar ég er ekki með neglur. Við þyrftum að finna einhverja barnapíu til að vera með Helgu svona af og til og ef þið vitið um einhverja rosa góða endilega látið mig vita. En aftur að grunninum, það er alveg að verða búið að reisa stoðirnar fyrir steypuna í grunninn og burðarveggina. Við ættum vonandi að geta steypt í næstu viku. Svo ætla þeir feðgarnir að fara að smíða útveggina um leið og veðrið verður leiðinlegt, ef það verður leiðinlegt. Við erum búin að panta glugga og útihurðar. Við ætlum að reyna að flytja inn um leið og gólfefni. baðherbergi og eldhús verða klár. Svo vinnum við hitt bara svona smátt og smátt, enda maður í fæðingarorlofi og nægur tími er það ekki ??? hehehe .

Jæja þetta er gott í bili, verið hress, ekkert stress og bless.

Fanney Bergrós og bumbubúinn.

Hæ,

Smá fréttaskot, við eigum von á öðrum erfingja í septemberlok.
Við erum að sjálfsögðu himinlifandi með þetta og hlökkum til að verða vísitölufjölskylda .
Blogga meira næst og svo ætla ég að setja myndir af prinsessunni inn um helgina.

Kveðja, Fanney og bumbubúinn